Аптаның алғашқы күні облыстағы БАҚ өкілдері 400 шақырымды артқа тастап, Арал ауданы, Қамыстыбас елді мекеніндегі «Қамбаш» олимпиадалар және қосымша білім беру орталығына арнайылап бардық. Негізгі мақсат – биылғы жылы өңірдегі өрендердің жазғы демалысын өткізу жоспарымен танысу.
Диірменнің тасындай дөңгеленген дүние бір орында тұрмайтыны түсінікті. Олай дейтініміз, дерт дендеген тұста білім саласы дәстүрлі оқудан онлайнға ауысып, біршама жұмыс баяулаған-тын. Ал, қазір алқымнан алған аурудың аптығы басылып, ағарту ісі алға жылжуда. Ковид салдарынан екі жыл тұралап қалған жазғы тынығу лагерьлеріде биыл оқушыларға қайта қуаныш сыйламақ. Бұл жөнінде «Қамбаш» олимпиадалар және қосымша білім беру орталығында өткен брифингте облыстық білім басқармасы тәрбие бөлімінің бас маманы Жадыра Шариева айтып берді.
– Биыл Қызылорда облысы бойынша 1-10 сынып аралығындағы 169263 баланың 100 мыңнан астамы жазғы тынығу лагерлерінде тынығады. Қызылорда облысында биылғы жылы 7 мемлекеттік және 2 жеке жазғы тынығу лагері балалар үшін жұмыс жасайды. Аталған лагерьлер 7 ауысымда 8260 бала тынығады деп жоспарлануда.
Айта кетейік, аймақта 270 мектеп жанында тамақпен және тамақсыз күндізгі тынығу лагерьлерінің жұмысы жүргізіледі. Мұнымен қоса, ата-анасының қамқорлығынсыз қалған, көп балалы және аз қамтылған отбасылардан шыққан 31 мың баланы сауықтыру демалысымен, саяхаттармен қамту бағытында қолдау шаралары бірінші орында ұйымдастырылатын болады,– деді бас маман.
Өңірдегі білім басқармасы тоғыз ай мектеп қабырғасында білім нәрімен сусындаған оқушылар үшін жазғы тынығу лагерін ұйымдастырып ғана қоймай, білім алушылар жаз мезгілінде бос уақытын тиімді пайдалану үшін түрлі шаралар жоспарлаған.
– Мектеп туризмін жандандыру бойынша өңірдегі тарихи-мәдени ескерткіштерге 32 мыңнан астам оқушы саяхаттайды. Сонымен қатар жаз маусымында 5 мың баланы облысымыздағы меценаттар мен демеушілер есебінен демалдыру, Нұр-Сұлтан қаласына экскурсиялау жұмыстары да жүзеге асырылады.
Жазғы уақытта балалардың бос уақытын тиімді ұйымдастыру мақсатында аулалық клубтар, бұқаралық спорт пен салауатты өмір салтын қалыптастыру, зияткерлік, дебаттық, техникалық, өнер, тілді шеберлігін дамыту бағыттарында оқушылар кең көлемде қамтылады. Айта кетейін, экскурсиялар кезеңінде балалардың қауіпсіздігін сақтау және түрлі төтенше жағдайлардың алдын алу бойынша тиісті шаралар қабылданып, арнайы медициналық көмекпен қамтамасыз етілетін болады,- дейді Жадыра Амантайқызы.
Осы ретте айта кету керек, оқушылар жаз мезгілінде уақытын тиімді пайдалану үшін жазғы тынығу лагерінен бөлек, балаларды ерте бастан еңбекке баулу мақсатында «Жасыл ел» еңбек жасақтарындағы көркейту, көгалдандыру және абаттандыру жұмыстарына тарту әлеуметтік жобасы ұйымдастырылмақ. Бұл жобада жалпы саны 1871 оқушы мен студент жұмыспен қамтылмақ.
Соңғы уақытта бір тартылып бір тасыған Қамбаш көлі – жазғы маусымдағы демалыс күндерін өткізуге ең қолайлы орын болып саналады. Сол себепті де Сыр жастары жазғы уақытын тиімді өткізу үшін көл жағасынан «Қамбаш» олимпиадалар және қосымша білім беру орталығы ашылды. Пандемия салдарынан жұмысы саябырлап қалған орталық биыл 7 ауысым бойынша 1000-нан астам баланы жазғы демалыспен қамтымақ. Биыл тек Сыр жастары ғана емес, көрші өңірдің оқушылары да бұл лагерьде демалуы жоспарлануда. Сонымен қатар, балалар демалысынан соң мұнда Қамбаш family отбасылық лагері ұйымдастырылады. Бұл туралы брифингте орталықтың директоры Рахан Қалиев айтып берді.
– Биылғы балалар жылына орай «Қазақстан балалары – жазды қуанышқа толтырайық» атты жазғы маусымның ашылу салтанатын 1 маусымға жоспарлап отырмыз. Лагерь бағдарламасында балалардың қызығушылығы мен психологиялық жас ерекшеліктерін есепке ала отырып топтарға бөліп, тәрбиешілер мен үйірме жетекшілері балалармен белсенді жұмыс атқарады. Сонымен қатар аталмыш орталық балаларды демалыспен қамтумен қатар «Робототехника», «Намыс» әскери-патриоттық клубы, «Happy Englіsh», «Золотой ключ» тілдік үйірмелері, «Спортпен достас», «Бассейнде жүзу» үйірмесі, «Алтын сөз», «Дизайн», «Жас пікір сайысшылар клубы», «Шұғыла» би үйірмелерін жүргізетін болады. Әрбір тынығушы өздерінің қалаған үйірмелеріне барып, өз уақыттарын тиімді әрі қызықты өткізуіне жағдай жасалынған,- деді Рахан Байтілесұлы.
Көл жағасында орналасқан орталықта оқушылар бір ауысымда ұзақтығы 10 күн демалып, бекітілген ас мәзірі бойынша 5 мезгіл дәруменді тамақтармен ауқаттанады. Демалушылардың денсаулығыда басты назарда. Мұнда сауықтыру шарасын ұйымдастыру мақсатында тіс емдеу кабинеті мен тіс дәрігері және дәрігер-педиатр жұмыс жасайтын болады.
Сонымен қатар мектеп туризмін дамыту үшін жазда тынығуға келген балалар еліміздің тарихын, мәдениеті мен өлкетануын таныстырып, насихаттау мақсатында Арал, Қазалы қалаларындағы мұражайларға, Байқоңыр қаласында орналасқан «Байқоңыр ғарыш айлағы» және «Қорқыт ата» кешеніне саяхаттайтын болады.
Жылдағы дәстүр бойынша биыл балалар демалысынан соң, мұнда Қамбаш family отбасылық лагері ұйымдастырылады. Орталық басшысының айтуынша, орталық бұл уақытқа дейін 70-80 отбасыға қызмет көрсетіп, шынайы алғысын алып үлгерген. Бұл қызмет түрі биылда жалғасын таппақ.
– Қамбаш көлі жағасындағы бір апталық бұл лагерь бағдарламасы мектепке дейінгі және мектеп жасындағы 4-13 жастағы балалары бар отбасылар үшін жасалды. Балалардың қызығушылығы бойынша үйірмелер, ата-аналарға семинарлар мен мастер-кластар, отбасылық арт-терапиялар, түрлі ойындар мен мәдени шаралар ұйымдастырылады.
Отбасылық лагерь – бүкіл отбасы болып керемет бірлескен шығармашылық тәжірибе жинақтауға, өмірді балалар көзімен көріп үйренуге, отбасы ішінде үйлесімді және бақытты қарым-қатынас орнатуға керемет мүкіншілік, — деді Қалиев Рахан.
Орталық басшысының айтуы бойынша, қызмет көрсету құны бір отбасыға күніне 3-4 мың теңге болмақ.
Орталыққта қызмет көрсету сервисі жоғары болғанымен, өкініштісі биыл маса қаулап тұр. Мұнан бөлек, көгалдандыру жұмысы да кенжелеп қалған. Демалушылар бір мезгіл таза ауамен тыныстап, дамылтап отыру үшін көкжелек керек-ақ. Орталықтың басшысының айтуы бойынша биыл көгалдандыру жұмысын қолға алып, алдағы уақытта жасыл-желекке айналдыру жұмысы жолға қойылмақ екен.
Елдос ЕРБОЛҰЛЫ
