Білім саласындағы тың серпіліс

Білім – тоқтаусыз дамуды, ілгері жылжуды қажет ететін сала. Күн сайын құбылып тұрған өзгерістер мен жаңашылдық тасада қалмай, ілесуді көрсетуде. Әсіресе, мектептің жүрегіне айналған мұғалімдердің біліктілігі бағаланып, тәжірибесі мол болғаны қоғамға ауадай қажет. Сонда ғана оқушылар ізденістің ізін үзбей, ұқыптылығымен һәм ой ұшқырлығымен алға ұмтылу мен талпыныстың қарқынын үдетіп, білектің күшімен емес, біліммен болашаған бағдарлайтын болады. Асылында, оқу мен мейі­рімнің мекені саналған мектеп пен балаға білім беруден еш жалықпайтын ұстаздың негізгі мақсаты осы емес пе?! Иә, кез келген мектепте бірнеше жылдық тәжірибесі бар, ұстанымы берік, талабы күшті, көргені мен түйгені көп мықты ұстаздар жетіп артылады. Дей тұрғанмен, санасы сергек, ойы зерек жас мамандардың да қарым-қабілеті жоғары екені айдан анық. Сондықтан еңбек жолын енді ғана бастаған жас мамандарға сеніммен қарап, қолдау көрсету қос қолды көтеріп құптайтын маңызды іс. Яғни, ісіне тиянақты, сөзінің салмағы бар жас мұғалімдердің белсенділігі мен білімін байқап, жаңа жобаларға тартып, шеберлігін шыңдайтын шараларды көптеп өткізген ләзім.

Осы ретте Қызылорда облысында тұңғыш рет “Жас мамандар” лигасы құрылмақ. Құрамына қала, ауыл мектептерінен белсенді жас мұғалімдер енгізіліп, түрлі бағыттағы жобалар бойынша жұмыс жасайтын болады. Бұл туралы облыстық білім басқармасының басшысы Мейрамбек Шермағанбет бүгін жас ұстаздармен өткен кездесуінде мәлімдеді.

Білім саласында үлгілі қызмет атқарып, жетістікке жүрген 40-тан астам жас мұғалімнің қатысуымен өткен жиында басқарма басшысы білім саласын қолдаудың жыл өткен сайын артып келе жатқандығын айтып, алдағы жоспарларымен бөлісті.

– «Жас келсе-іске» деген дана халқымыз жастарымызға әр қашанда сенім артып, қолдау көрсетіп отырған. Алдағы уақытта аймағымызда жас мамандар резервін жасақтап, болашағынан үміт күттірер басқарушылар іріктеледі,- деді Мейрамбек Зинабдинұлы.

Кездесу барысында басқарма басшысы жас мамандармен емін-еркін сұхбаттасып, олардың өтініш-тілектерін, білім саласына қатысты ой-пікірлерін тыңдады. Арал ауданындағы мамандандырылған мектеп-лицей интернатының жас мұғалімі Қараман Садықов «облыстың жас ұстаздарының лигасы құрылса» деген ұсынысын білдірді. Сала басшысы мұндай бірлестіктер, лигалар жаңа идеялардың пайда болуына және тәжірибе алмасуға жол ашатынын айтып, жас ұстаздардың лигасы құрылатындығын жеткізді.

Жиын соңында басқарма басшысы әр аудан мен қаладан жиналған үздік жас мамандарды алғыс хатпен марапаттап, ел болашағы үшін аянбай еңбек етуге шақырды.

Замира ҚОНЫСЖАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған