Өткен сенбі күні сапалы білім, жүйелі бағдарлама, үздік нәтижені мақсат тұтқан Qazbilim ұлттық лицейінің Қызылорда қаласында ашылу рәсімі өтті. Салтанатты кешке Астанадан арнайы «Qazbilim group» компаниясының басқарма төрағасы Аятжан Ахметжанұлы келді. Сонымен бірге елге белгілі, ұлтқа жанашыр Сыр елінің азаматтары да қатысып, тілектестігін білдірді. Ашылу салтанатының лентасын «Ұстаз мәртебесі» газетінің бас редакторы, Болашақ университетінің аға оқытушысы, филология ғылымдарының кандидаты Нұрлан Көбегенұлы мен Қорқыт ата атындағы Қызылорда универсиетінің әлеуметтік және тәрбие жұмысы бөлімінің басшысы, жастар жанашыры Жанар Бимұратқызы қиып, жаңа білім ордасына ақжол тіледі.
Оқушыны әрі сапалы біліммен, әрі ұлттық тәрбиемен сусындататын білім ошағының ашылғаны Қызылорда үшін жаңалық болды. Болашақ университетінің бұрынғы оқу корпусына орналасқан жаңа білім ордасына тілекші адам көп. Әсіресе, 10-11 сыныптарда баласын репетиторға апарып, әуре болатын ата-аналар үшін бір мәселесі шешілгендей қуанды. Себебі бұл жерде негізгі және қосымша сабақтар мен үйірмелер толық қамтылған.
Әрине, оқу ақылы түрде. Осы күнге дейін түлектерінің 97 пайызы мемлекеттік грант иегері атанған оқу ордасының бір жылдық оқу ақысы 5-9 сыныптар үшін 400 мың теңге болса, 10-11 сыныптарға 500 мың теңге төлеп, сапалы білім алуға мүмкіндігі бар екен.
Ұлттық лицейдің ерекшеліктері бізді де қызықтырды. Сабақ кестесі таңғы 8:30-да басталып, 16:30-да аяқталады. Лицей таза қазақ тілінде тереңдете білім береді әрі баланың бойына ұлттық тәрбиені сіңіреді. Сыныптарда оқушы саны 16-18 оқушыдан аспайды. Пәндік олимпиадаға бағдарлы дайындық және ҰБТ-ға кешенді дайындық жүргізеді. Домбыра, жетіген, т.б. ұлттық аспаптар үйірмелері жұмыс жасайды. Шахмат, тоғызқұмалақ, т.б. интеллектуалды ойындарға басымдық беріледі. Талап қатаң. Еркелікті көтермейді. Бала үш рет сабақтан қалғаннан кейін тағы бармай қалса, оқудан шығарылады.
600 оқушыға арналған Qazbilim ұлттық лицейі биыл 5-11-сынып аралығында оқитын 400 оқушыны қабылдауға мүмкіндігі бар. Бұған дейін жергілікті жердің 1200 мұғалімі арасынан 3 кезеңнен тұратын іріктеу туры өткізілген. Мамандығы бойынша біліктілік тест, әңгімелесу және құжаттық тексерістен сәтті өткен елуге жуық мұғалім жұмысқа қабылданған. Бұл жерде пара беріп, аға-көкемен жұмысқа орналасу жоқ екен. Содан болар, осы уақытқа дейін лицейге қабылданғандар қажетті мамандардың 85 пайызын құраған. Ал, биолог мамандығы бойынша сыннан әлі ешкім өте алмапты. Егер жергілікті жерден үздік мамандар табылмай жатса, өзге өңірлерден әкелінбек. Қазірдің өзінде Астанадағы орталықтан екі математик келген. Лицей директоры де астаналық.
– Тамыз айының басында Ақтау қаласына барып, ұжымды 12 күн тереңдетіп оқытып келдік. Онда ұлттық мектептің концепциясы, оның жүзеге асырылу барысы, қолданыстағы методикамыз туралы жан-жақты ақпараттар айтылды. Осы күні мектептің материалдық-техникалық базасының 60 пайызы жасақталды. Оқу жылы басталғанша 100 пайыз қамтылады. Кітап қорымызда 5 мыңнан астам көркем әдебиет бар. Оның 2 мыңы қазақтың классикалық әдебиеті болса, 3 мыңы – қазіргі сапалы аударма әдебиеттер. Аудармаларға шетелдің үздік классикалық әдебиеті мен жаратылыстану пәнінің кітаптары кіреді. Сондай-ақ, министрлік бекіткен оқулықтар мен Qazbilim оқытушыларының авторлығындағы 180-нен астам кітап оқушылардың білім алуына қызмет ететін болады. Сонымен бірге пәндік олимпиадалар мен ұлттық бірыңғай тестілеуге арналған оқулықтар мен әдістемелік құралдар да бар, – дейді А.Ахметжанұлы.
Qazbilim ұлттық лицейінде 1 кітапхана, 3 спорт залы және бір асхана бар. Асхана бір уақытта 180 адамды қабылдай алады. Оқушыларға бір уақыт ыстық тамақ беріледі. Бірнеше үйірме жұмыс істейді. Ата-аналар балаларын 2 үйірмеге тегін қатыстырады.
Осы кезге дейін оң мыңнан астам дарынды шәкіртке білім беріп, үлкен жетістіктерге қол жеткізген Qazbilim – 7 қалада мектеп, 1 қалада білім беру орталығы, барлығы 8 қалада жұмыс істейтін үлкен білім ордасына айналған іргелі ұжым.
Н.Меңдібай
